Болажонлар ёзги таътилни мароқли ва мазмунли ўтказишларини таъминлаш учун Ўзбекистон футбол Ассоциацияси Ўзбекистон касаба уюшмалари Федерацияси билан ҳамкорликда ҳар бир вилоятда футбол фестивалларини ташкил этишга қарор қилгани ҳақида аввал хабар бериб ўтгандик.
“Ёз ўтмоқда соз” шиори остидаги мини футбол мусобақалари бу сафар Навоий вилоятининг Кармана туманидаги “Ишонч” болалар соғломлаштириш ёзги оромгоҳида бўлиб ўтди. Ёзги оромгоҳда дам олаётган болалар олтита жамоага бўлинган ҳолда мусобақаларда иштирок этдилар. “Ишонч”, “Қувноқлар”, “Соғлом авлод”, “Шунқорлар”, “Бургутлар” хамда “Лочинлар” жамоалари ўртасида кечган муросасиз курашлардан кейин ғолиблар аниқланди.
Спорт тадбири вилоят футбол федерацияси ходимлари томонидан юқори савияда ташкиллаштирилиб, қатнашчилар ва томошабинларда катта таассуротлар қолдирди.
Мусобақа ғолибларига Ўзбекистон футбол ассоциациясининг сертификат ва эсдалик совғалари топширилди.