Bolajonlar yozgi ta’tilni maroqli va mazmunli o‘tkazishlarini ta’minlash uchun O‘zbekiston futbol Assosiasiyasi O‘zbekiston kasaba uyushmalari Federasiyasi bilan hamkorlikda har bir viloyatda futbol festivallarini tashkil etishga qaror qilgani haqida avval xabar berib o‘tgandik.
“Yoz o‘tmoqda soz” shiori ostidagi mini futbol musobaqalari bu safar Navoiy viloyatining Karmana tumanidagi “Ishonch” bolalar sog‘lomlashtirish yozgi oromgohida bo‘lib o‘tdi. Yozgi oromgohda dam olayotgan bolalar oltita jamoaga bo‘lingan holda musobaqalarda ishtirok etdilar. “Ishonch”, “Quvnoqlar”, “Sog‘lom avlod”, “Shunqorlar”, “Burgutlar” xamda “Lochinlar” jamoalari o‘rtasida kechgan murosasiz kurashlardan keyin g‘oliblar aniqlandi.
Sport tadbiri viloyat futbol federasiyasi xodimlari tomonidan yuqori saviyada tashkillashtirilib, qatnashchilar va tomoshabinlarda katta taassurotlar qoldirdi.
Musobaqa g‘oliblariga O‘zbekiston futbol assosiasiyasining sertifikat va esdalik sovg‘alari topshirildi.