Жаҳон чемпионатининг дастлабки ярим финал баҳси бўлиб ўтмоқда. Франция ва Бельгия терма жамоалари ўртасидаги учрашувнинг биринчи бўлими якунига етди.

Дастлабки 45 дақиқалик жуда қизиқарли кечди, хавфли вазиятларга бой бўлди. Ўйин бошидан бельгияликлар тўп назоратини ўз томонига олишди. "Қизил иблислар" бир неча марта қизиқарли комбинациялар ташкил қилишди. Баҳснинг 16-дақиқасида де Брюйненинг узатмасидан кейин Азар жарима майдончасининг чап томонида тўпни эгаллади ва зарба берди. Тўп олис устун ёнидан ўтиб кетди. Орадан 3 дақиқа ўтиб Эден яна бир зарба йўллади, аммо бу сафар вазият бор-йўғи бурчак тўпи билан якунланди. Орадан 2 дақиқа ўтиб бельгияликлар ҳисобни очишга яқин келишди. Бурчак тўпи ўйинга киритилган вазиятда тўп Алдервейрельдга келиб тушди. Унинг зарбаси нақ "тўққизлик"га кираётганди, аммо Льорис маҳорат кўрсатиб, зарбани қайтарди.

Бўлимнинг иккинчи ярмида энди французлар хавфли вазиятлар ярата бошлашди. Олис масофадан етказилган узатма натижасида Килиан ўнг қанотдан жарима майдончасига кирди ва нариги томондан ёрдамга келаётган Жируга пас берди. Оливье зарба беришни қойиллатмади.

Баҳснинг 39-дақиқасида Мбаппе жарима майдончасига яширин узатма берди ва Павар дарвозабон билан яккама-якка вазиятга чиқиб кетди. Француз ҳимоячисининг зарбасини Куртуа оёғи билан қайтариб қолди. Агар Павар бироз, кўп эмас, бир қарич баландроқ зарба берганида, тўп аниқ тўрга бориб тушган бўларди.

Ҳозирча Франция - Бельгия ўйинида шундай гаплар.

ЖЧ-2018, ярим финал
Франция – Бельгия 0:0 (биринчи бўлимдан сўнг)
10 июль, 23.00, «Крестовский»
Франция – Льорис, Варан, Люка Эрнандес, Павар, Умтити, Канте, Погба, Матюиди, Гризманн, Жиру, Мбаппе.
Бельгия – Куртуа, Вертонген, Алдервейрелд, Компани, Шадли, Витцель, де Брюйне, Феллайни, Дембеле, Азар, Лукаку.