Жаҳон чемпионатининг иккинчи ярим финал жуфтлигида кутилмаган натижа қайд этилди. Хорватия терма жамоаси Англия устидан иродали ғалаба қозониб, финал йўлланмасини қўлга киритди.

Учрашувнинг 5-дақиқасидаёқ ҳисоб очилди. Киран Триппье жаримадан  шу даражада аниқ зарба бердики, тўп "тўққизлик"га кириб кетди! Мазкур гол туфайлими ёки хорватлар плей-офф босқичининг аввалги 2та баҳсида 120 дақиқа ўйнагани учун, танаффусга қадар уларнинг ўйини у қадар қовушмади. Аксинча, инглизлар ўйиннинг 31-дақиқасида ҳисобдаги фарқни ошириш имкониятида фойдалана олишмади. Лингард жарима майдончаси ташқарисида тўпни эгаллаб, ичкаридаги Кейнни бирга-бир вазиятга чиқариб юборди. Ҳаррининг зарбасини Субашич қайтарди, Кейн тўпга етиб бориб, ўткир бурчак остида жуда яқин масофадан зарба берди. Тўп устунга, сўнгра дарвозабоннинг оёғига тегиб, майдонни тарк этди.

Иккинчи бўлим ўрталарида Хорватия кутилмаганда ҳисобни тенглаштириб қўйди. Ўнг қанотдан ҳаволатиб жарима майдончасига узатма берилди. Уокер бош билан тўпни қайтармоқчи бўлганида, Перишич оёғини баланд кўтариб, тўпни дарвозага буриб юборди.

Орадан 4 дақиқа ўтиб Иван Перишичнинг ўзи жамоасини ҳисобда олдинга олиб чиқиши керак эди. Футболчи рақиб жарима майдончаси ичида тўпни қабул қилди, чап томонга бир ҳимоячини алдади ва олис бурчак томон зарба берди. Тўп устунга тегиб қайтди! Қайтган тўпга Ребич 10 метрлардан зарба берди. Бу сафар Пикфорд тўпни эгаллади.

Экстра-таймларнинг дастлабкисида Саутгейт шогирдларида битта ажойиб имконият юзага келди. Бурчакдан етказилган узатмага Стоунз бош билан зарба берди. Тўп эса устунга тегиб қайтди.

Барчаси пенальтилар сериясига қараб кетаётгандек эди, аммо Хорватия ғалаба тўпини киритишга муваффақ бўлди. Дастлаб Англия жарима майдончасига етказилган узатмани Стоунз қайтарди. Юқорига кўтарилган тўпни Перишич бош билан жарима майдончаси қайтарди. Буни ҳимоячилар кутмаганди шекилли, улар Манжукични бўш қолдиришди. Марио яқин масофадан дарвозани забт этди!

Қолган дақиқаларда Англия катта куч билан олдинга ташланди, аммо улар голга тортадиган вазият ярата олишмади.

Шу тариқа, Хорватия терма жамоаси ўз тарихида илк марта Жаҳон чемпионати финалига чиқди. Чемпионлик учун курашда уларга Франция рақиблик қилади. Бельгия ва Англия терма жамоалари бронза медали учун майдонга чиқадилар.

ЖЧ-2018. ярим финал
Хорватия – Англия 2:1 (0:1, 1:0, 0:0)
Голлар: 0:1 – 5 Триппьер, 1:1 – 68 Перишич, 2:1 – 109 Манджукич.
Хорватия – Субашич, Ловрен, Стринич (Пиварич, 95), Врсалько, Вида, Ракитич, Брозович, Перишич, Модрич (Бадель, 119), Ребич (Крамарич, 101), Манджукич (Чорлука, 115).
Англия – Пикфорд, Уокер (Варди, 112), Стоунз, Янг (Роуз, 90), Магуайр, Алли, Лингард, Стерлинг (Рэшфорд, 74), Хендерсон (Дайер, 97), Триппьер, Кейн.
Огоҳлантиришлар: Манжукич (48), Уокер (54), Ребич (96).