Болгариянинг Пловдив шаҳрида байдарка ва каноэда эшкак эшиш бўйича 23 ёшгача бўлган ёшлар ўртасида жаҳон чемпионати бўлиб ўтаётганлиги ҳақида хабар қилгандик. Ушбу нуфузли мусобақада мамлакатимиз шарафини 16 нафар спортчи ҳимоя қилаётганлигидан ҳам хабарингиз бор.
Жаҳоннинг 85 мамлакатидан 456 нафар спортчи иштирок этаётган мусобақада спортчиларимиз совриндорлар қаторидан ўрин олишга муваффақ бўлдилар.
С-2 қайиғида жуфтликда 200 метрлик масофага эшкак эшган Дилноза Раҳматова ҳамда Нилуфар Зокирова тандеми кумуш медални қўлга киритишди. Қизларимиз бу борада фақат белоруслик рақибларидан ортда қолишди.
Артур Гулеев ва Элёржон Мамадалиевлар С-2 қайиғида 500 метр масофага эшкак эшиб, кумуш медалини қўлга киритдилар.
Чемпионат давом этмоқда.
