Англия терма жамоасининг собиқ бош мураббийи Сэм Эллардайс АПЛнинг 3-турида "Манчестер Юнайтед" - "Тоттенҳэм" (0:3) учрашувига шарҳ берди.

"Юнайтед" 57% вақтда тўпга эгалик қилди, 23 марта зарба берди, улардан 5 таси дарвоза соҳасига аниқ борди. "Тоттенҳэм" 43% тўпга эгалик қилди, 9 та зарба ва улардан 5 таси аниқ. Шундай экан, улар ғалабасининг ягона сабаби - самарадорлик. Бошқа исталган кун натижа бошқача бўлиши мумкин эди.

Агар жамоа ўз майдонида 23 марта зарба берар экан ва гол уролмас экан, бунда мураббийнинг айби йўқ. Аммо натижада ҳамма айбловлар унинг зиммасига тушади. Моуриньо ўз жамоасини ҳужумкор ўйинга шайлаган, улар етарли вазиятлар яратишди. Аммо улар бундан фойдалана олмадилар ва ҳимоядаги кучсиз ўйиндан жабр чекдилар.

Албатта, бу ҳалокат, чунки ҳисоб 0:3. Ҳозир ҳамма жазавада, фактларга ҳеч ким эътибор бермайди, ҳамма учун ҳисоб муҳим. Фактлар эса шундай: "Юнайтед" "Тоттенҳэм"дан кўпроқ яратди, улар рақибдан устун бўлишди, аммо имкониятни бой бердилар", - дейди Эллардайс.