Бугун Суперлиганинг 2-босқич баҳсларига пойтахтимиз Тошкентда тайёргарлик кўраётган Наманганнинг “Навбаҳор” клуби  айни пайтда “Чиғатой” спорт базасида йиғин ўтказаётган Ўзбекистон U-21 терма жамоасига қарши ўртоқлик учрашуви ўтказди.

Мазкур ўйинда жамоамиз устози Илҳом Мўминжонов Ўзбекистон U-23 олимпия таркибида Осиё ўйинларида иштирок этган дарвозабон Ботирали Эргашев, ярим ҳимоячи Азизбек Турғунбоев, шунингдек, енгил жароҳатлари борлиги сабабли,  ярим ҳимоячи Илҳом Бойдедаев ва ҳужумчи Азамат Алланиёзовнинг хизматларидан фойдаланолмади. Аммо қолган барча асосий таркиб футболчилари ҳамда ёш ўйинчиларни майдонга туширди.

Баҳс U-21 терма жамоамизнинг 2:0 ҳисобидаги ғалабаси билан якунланди.   “Лочинлар”га қарши кечган назорат-синов баҳси Суннатилла Абдурасулов бошчилигидаги U-21терма жамоамиз учун Хитойда ўтказиладиган халқаро мусобақа олдидан футболчиларнинг жисмоний ҳолатларини яхшилаб олиш учун  ўзига хос тайёргарлик вазифасини ўтаган бўлса, “Навбаҳор” аъзоларига ўйин амалиётини сақлаб туриш учун ёрдам берганлиги эҳтимолдан холи эмас.     

Жамоамиз Тошкентдаги йиғинни эртага якунлайди.Шундан сўнг Ўзбекистон мустақиллигининг 27 йиллиги байрами муносабати билан “Навбаҳор” аъзолари қисқа муддатли таътилга чиқишади.   

“Навбаҳор” ПФК матбуот хизмати.