Хабарингиз бор, Ўзбекистон ва Тожикистон давлатлари ўртасидаги алоқаларни янада мустаҳкамлаш ва барча соҳаларда ҳамкорликни ривожлантириш борасида икки томонлама кенг қамровли ишлар олиб борилмоқда.

Хусусан, президентимиз Шавкат Мирзиёевнинг март ойида Душанбедаги ташрифлари доирасида икки давлат ҳукуматлари ўртасида тузилган келишувларга мувофиқ, Самарқанд ва Тожикистоннинг Сўғд вилояти ўртасидаги йирик бизнес форуми ва тадбирлар доирасида апрель ойида Самарқандда “Динамо” – “Хўжанд” (2:2) ўйини ҳам ўтказилганди.

Август ойида эса Тожикистон президенти Эмомали Раҳмоннинг Тошкентдаги расмий давлат ташрифи чоғида ҳукуматлар ўртасида имзоланган битимлар, хусусан Самарқанд вилояти ҳокими Эркинжон Турдимов ва Тожикистоннинг Сўғд вилояти ҳокими Ражаббой Аҳмадзода ўртасида имзоланган келишувга мувофиқ, 7-9 сентябрь кунлари Сўғд вилояти маркази Хўжанд шаҳрида Сўғд ва Самарқанд вилоятлари ўртасида йирик бизнес форуми, самарқандлик тадбиркорлар маҳсулотлари кўргазмаси, икки давлат санъаткорлари иштирокида концерт дастури ва футбол учрашуви ташкил этилади. Шунингдек, Самарқанд делегацияси 9 сентябрь куни – Тожикистон Мустақиллигининг 27 йиллик байрам тадбирларида иштирок этади.

“Динамо” жамоаси Самарқанд вилояти делегатция таркибида бугун эрталаб Тожикистонга жўнаб кетди.

“Хўжанд” ва “Динамо” ўртасидаги ўртоқлик учрашуви 7 сентябрь, соат 17:00да Хўжанддаги марказий стадионда бошланади. Учрашувда Самарқанд вилояти ҳокими Эркинжон Турдимов ва Тожикистоннинг Сўғд вилояти ҳокими Ражаббой Аҳмадзодалар иштирок этиб, ўйинни расман бошлаб беришлари кутилмоқда.

Халқаро Ўртоқлик учрашуви.

7 сентябрь (жума)

«ХЎЖАНД» (Тожикистон) – «ДИНАМО» (Ўзбекистон)

Бош ҳакам: Хуршед Дадабоев (Хўжанд)

Ўйин бошланиш вақти: 17:00.