Xabaringiz bor, O‘zbekiston va Tojikiston davlatlari o‘rtasidagi aloqalarni yanada mustahkamlash va barcha sohalarda hamkorlikni rivojlantirish borasida ikki tomonlama keng qamrovli ishlar olib borilmoqda.
Xususan, prezidentimiz Shavkat Mirziyoyevning mart oyida Dushanbedagi tashriflari doirasida ikki davlat hukumatlari o‘rtasida tuzilgan kelishuvlarga muvofiq, Samarqand va Tojikistonning So‘g‘d viloyati o‘rtasidagi yirik biznes forumi va tadbirlar doirasida aprel oyida Samarqandda “Dinamo” – “Xo‘jand” (2:2) o‘yini ham o‘tkazilgandi.
Avgust oyida esa Tojikiston prezidenti Emomali Rahmonning Toshkentdagi rasmiy davlat tashrifi chog‘ida hukumatlar o‘rtasida imzolangan bitimlar, xususan Samarqand viloyati hokimi Erkinjon Turdimov va Tojikistonning So‘g‘d viloyati hokimi Rajabboy Ahmadzoda o‘rtasida imzolangan kelishuvga muvofiq, 7-9 sentyabr kunlari So‘g‘d viloyati markazi Xo‘jand shahrida So‘g‘d va Samarqand viloyatlari o‘rtasida yirik biznes forumi, samarqandlik tadbirkorlar mahsulotlari ko‘rgazmasi, ikki davlat san’atkorlari ishtirokida konsert dasturi va futbol uchrashuvi tashkil etiladi. Shuningdek, Samarqand delegasiyasi 9 sentyabr kuni – Tojikiston Mustaqilligining 27 yillik bayram tadbirlarida ishtirok etadi.
“Dinamo” jamoasi Samarqand viloyati delegatsiya tarkibida bugun ertalab Tojikistonga jo‘nab ketdi.
“Xo‘jand” va “Dinamo” o‘rtasidagi o‘rtoqlik uchrashuvi 7 sentyabr, soat 17:00da Xo‘janddagi markaziy stadionda boshlanadi. Uchrashuvda Samarqand viloyati hokimi Erkinjon Turdimov va Tojikistonning So‘g‘d viloyati hokimi Rajabboy Ahmadzodalar ishtirok etib, o‘yinni rasman boshlab berishlari kutilmoqda.
Xalqaro O‘rtoqlik uchrashuvi.
7 sentyabr (juma)
«XO‘JAND» (Tojikiston) – «DINAMO» (O‘zbekiston)
Bosh hakam: Xurshed Dadaboyev (Xo‘jand)
O‘yin boshlanish vaqti: 17:00.
