Ўзбекистон футбол ассоциациясининг 1-вице президенти Умид Аҳмаджоновнинг ташаббуси билан "Реал Мадрид" клуби академияси ва ЎФА ўртасида тузилган келишувга асосан мадридлик мутахассислар томонидан танлаб олинган 20 нафар бола Real Madrid Foundation Clinic дастури бўйича мастер классларда иштирок этиб, тажрибаларини ошириш мақсадида Испаниянинг Мадрид шаҳрига юборилаётгани ҳақида хабар берган эдик.
“Чиғатой” спорт базасида Испанияга маҳорат дарсларини ўташ учун йўл олаётган футболчиларни кутиб олиш ҳамда уларнинг ота-оналари билан хайрлашув маросимини ўтказиш жараёни бўлиб ўтди. Йиғилишда ЎФА мутасаддилари ташриф буюрган ота-оналарга Испания сафари, у ерда амалга оширилиши режалаштирилган маҳоратни ошириш бўйича тадбирлар, мастер класслар, сафар давомида ташриф буюриладиган жойлар ҳақида маълумотлар берилди. Ота-оналар ва болалар ўзларини қизиқтирган саволларни бериб унга жавоб олдилар.
Йиғилиш сўнгида ота-оналар сўзга чиқиб, ушбу тажриба орттириш сафарни уюштириб бергани учун Ўзбекистон футбол ассоциацияси 1-вице Президенти Умид Аҳмаджоновга ҳамда ташкилотнинг барча мутасаддиларига миннатдорчилик билдириб, ота-оналар томонидан ёзилган ташаккурномани тақдим этишди. Сафарга отланган болалар ва уларни бориб-келишларида ҳамроҳлик қилаётган мураббий ва мутасаддиларга оқ йўл тилашди.
Йиғилиш ниҳоясига етгач, болалар ётоқхоналарга жойлаштирилди. Уларга 3 кунлик сафар олди ўқув-йиғин машғулотлари эълон қилинди. Шундан сўнг 29 сентябрь куни Мадридга сафар қилинади. Мадрид сафари 6 октябрь кунига қадар давом этади.
