Ўзбекистон футбол ассоциацияси биринчи вице-президенти Умид Аҳмаджонов Суперлига формати ўзгариши мумкинлигини таъкидлади. Бу ҳақда Аҳмаджонов “Футбол Экспресс” газетасига берган интервьюсида айтиб ўтган.
“Суперлига формати 2019 йилда ҳам шундай қолади деб айта олмайман. Албатта, Бошқа вариантларни кўриб чиқамиз. Суперлигада айни вақтда 12 жамоа иштирок этяпти.
Лекин футбол миллионлар ўйини эканлигини унутмаслик керак. Ўзбекистонда футболни жуда севишади. Шунинг учун, ҳар бир вилоят ва шаҳарда футбол бўлиши керак.
Биргина Тошкентнинг ўзидан учта жамоанинг нима кераги бор? Масалан, мен Андижон халқи ўз жамоасини Суперлигада кўришни истайман. Чунки улар бунга ҳақли. Самарқандда ҳам футбол бўлиши керак.
Шу боис, биз чемпионат форматини қайта кўриб чиқамиз ва буни муҳокама қиламиз. Футболдан бутун халқимиз баҳраманд бўлиши керак.
Биз Ўзбекистон футболини юксакларга кўтариш учун меҳнат қиляпмиз. Шунинг учун чемпионатимиз тизими борасида ҳаммасини яхшилаб ўйлаб кўрганимиздан кейин, қарор чиқарамиз”
Демак, Умид Аҳмаджоновнинг сўзлари агар тасдиғини топса, кейинги мавсум Суперлигада ҳар бир вилоятдан биттадан жамоа иштирок этиши мумкин бўлади.
