O‘zbekiston futbol assosiasiyasi birinchi vise-prezidenti Umid Ahmadjonov Superliga formati o‘zgarishi mumkinligini ta’kidladi. Bu haqda Ahmadjonov “Futbol Ekspress” gazetasiga bergan intervyusida aytib o‘tgan.

“Superliga formati 2019 yilda ham shunday qoladi deb ayta olmayman. Albatta, Boshqa variantlarni ko‘rib chiqamiz. Superligada ayni vaqtda 12 jamoa ishtirok etyapti.

Lekin futbol millionlar o‘yini ekanligini unutmaslik kerak. O‘zbekistonda futbolni juda sevishadi. Shuning uchun, har bir viloyat va shaharda futbol bo‘lishi kerak.

Birgina Toshkentning o‘zidan uchta jamoaning nima keragi bor? Masalan, men Andijon xalqi o‘z jamoasini Superligada ko‘rishni istayman. Chunki ular bunga haqli. Samarqandda ham futbol bo‘lishi kerak.

Shu bois, biz chempionat formatini qayta ko‘rib chiqamiz va buni muhokama qilamiz. Futboldan butun xalqimiz bahramand bo‘lishi kerak.

Biz O‘zbekiston futbolini yuksaklarga ko‘tarish uchun mehnat qilyapmiz. Shuning uchun chempionatimiz tizimi borasida hammasini yaxshilab o‘ylab ko‘rganimizdan keyin, qaror chiqaramiz”

Demak, Umid Ahmadjonovning so‘zlari agar tasdig‘ini topsa, keyingi mavsum Superligada har bir viloyatdan bittadan jamoa ishtirok etishi mumkin bo‘ladi.