Россиялик UFC жангчиси Ҳабиб Нурмагомедов ирландиялик Конор Макгрегор устидан қозонилган ғалаба ва жангдан сўнг юзага келган муштлашувга пресс-конференцияда изоҳ берди.

“Невада комиссиясидан, Лас-Вегасдан узр сўрамоқчиман. Ўзимни яхши томондан кўрсата олмаганимни биламан. Нима учун ҳозир фақат мен қафасдан сакраб ўтиб, кимгадир ҳужум қилганим ҳақида гапиришаётганини тушунмаяпман.

Аммо биз Макгрегорнинг нима қилгани ҳақида гаплашмаяпмиз. У мени диним, мамлакатим ва отамни ҳақорат қилди. У Бруклинда автобусга ҳужум қилди. У бир неча кишини ўлдириб қўяй деди. Бу ҳақда нима дейсиз?

Мен олдин ҳам бу ўйинни ўзгартирмоқчи эканлигимни айтганман. Одамлар рақиб, унинг отаси, дини ҳақида ҳар хил бемаъни гапларни айтишини истамайман. Дин ва миллат ҳақида гапириш мумкин эмас. Бу мен учун муҳим. Отам мени ҳар доим ҳурмат сақлашга ўргатган. Уйга борганимда у мени таъзиримни беришини билиб турибман. Невада, кечир. Вегас, кечир. Мен енгилмас ва мутлақ чемпионман.

Бутун медиа Макгрегор Путин билан суратга тушгани ва бошқа нарсалар ҳақида гапирди. Путин ҳозиргина менга телефон қилди ва мен билан фахрланишини айтди. У “Сени табриклайман” деб айтди. Мен бу билан фахрланаман”, деди Нурмагомедов.

Тошкент вақти билан бугун тонгда ўтказилган жангда Ҳабиб Нурмагомедов тўртинчи раундда Конор МакГрегорни бўғиш усули билан ғолиб чиқди. Аммо жанг тугаши билан октагон ташқарисида ва октагон ичида жанжал юзага келди. Ҳозирда ушбу ҳолат бўйича текширув олиб борилмоқда.