Енгил вазнда UFC чемпиони Ҳабиб Нурмагомедов РПЛ 11-тури доирасида "Анжи" ва ЦСКА ўртасидаги ўйинда тўпни ўйинга киритиб беради.
Ўйин олдидан Нурмагомедовни шарафлаш маросими бўлиб ўтади. Бу ҳақида Махачқалъа клуби матбуот хизмати хабар бермоқда.
"19 октябрь куни "Анжи Арена" стадионида, жонажон "Анжи"нинг ўйинида кўришамиз. Келинг, қизиқ нарсалар кўп бўлади, рақибимиз оддий эмас - ЦСКА. Бизнинг жамоамизга далда керак.
2001 йилни яхши эслайман, ўйинга кириш учун "Динамо" стадионини икки марта айлангандим, аммо чипта учун пулим йўқ эди, "Анжи"га мухлислик қилишни жуда хоҳлагандим. Натижада танишимни топдим, уни Гизияв деб аташарди. У эркин курашнинг катта гуруҳида, мен эса кичик гуруҳида шуғулланар эдик. У мени стадионга текинга қўйиб юборди. Бўш ўриндиқлар йўқ эди, 90 дақиқа тик туриб ўйинни томоша қилгандим. Орадан 20 йил ўтди, кўп нарса ўзгариб кетди", - деб ёзади Нурмагомедов Инстаграмда.
