Трансфер ҳуқуқи бўйича «Барселона»га тегишли ва айни пайт «Истанбул» клуби сафида тўп сураётган туркиялик ярим ҳимоячи Арда Турон навбатдаги можарога ўралашиб қолди. Football Espanaнинг хабар беришича, эҳтиросли футболчи бу сафар Истанбулдаги тунги клублардан бирида туркиялик қўшиқчи Беркай Шахинни уриб, унинг бурнини синдирди...
Маълум бўлишича, Арда Турон хонанданинг рафиқаси Ўзлем Шахинга гап отгач, ўртада жанжал келиб чиққан. Fanatik нашрида ёзилишича, еврофутболда ном қозонган ярим ҳимоячи Ўзлем Ади Шахинга яқинлашиб, ортиқча гапирган: «Агар бўйдоқ бўлганимда эди, сендек ҳурлиқо жонон ёнидан бепарво ўтиб кетолмасдим асло...». Табиийки, бу Беркай ҳамиятига теккан ва ўртада низо чиққан. Якунда бурни синган қўшиқчини шифохонага олиб боришган. Қўшимча қилинишича, уни тезда жарроҳлик столига ётқизишган. Хуллас, жабрланувчи шифохонада қолган.
Воқеа шу билан тугамаган. Яъни Турон кейинроқ Шахин ортидан шифохонага бориб, қўлида тўппонча кўтариб турганча ундан кечирим сўраган: «У сенинг турмуш ўртоғинг эканлигини билмагандим. Мени кечир, илтимос. Хоҳласанг, тўппонча билан мени отиб ташла...». 31 ёшли фахрий футболчи ушбу можаро ҳақида «Инстаграм»даги шахсий саҳифасида ҳам ёзди. Тўғри, Арда унда қўшиқчининг ҳамхонасига шилқимлик қилганини инкор этди: «Ҳа, ўша ерда иккимиз баҳслашиб қолдик. Ресторанга дўстларим билан боргандим. Аммо алоҳида таъкидлайман, жанжалнинг сабаби ор ёки номус эмас...».
Айтиш керак, Туркия футболининг энг ёрқин вакилларидан бири ҳисобланган Арда Турон олдин ҳам бир неча марта турли кўнгилсиз воқеаларга ўралашиб қолганди. Мисол учун, 2017 йилнинг ёзида Туркия терма жамоаси устози Фотиҳ Терим уни таркибдан четлаштирганди. Сабаби - Арда самолётда футболчилар билан бирга учган журналистни бўғиб, ўлдириб қўйишига сал қолганди. Футболчи айни ўша можародан кейин терма жамоадаги фаолиятини якунлаб қўя қолганди.
Яна бир нохуш воқеа шу йил март ойида кузатилди: туркиялик журналистлардан бири Туронга рафиқаси ҳақида савол бердию, балога дучор бўлди. Яъни ғурури баланд ярим ҳимоячи бирданига қутуриб кетиб, мухбирга ошкора таҳдид солди: «Аслида бошингни танангдан жудо қилиш керак экан. Ҳушёр юр». Май ойида эса футболчи Туркия чемпионатининг ўтган мавсуми 32-туридан ўрин олган «Сивасспор»га қарши ўйинда ҳакамга ташланди. Оқибатда мамлакат футбол федерацияси уни нақ 16та ўйинга дисквалификация қилди.
Дарвоқе...
Маълумот учун айтиш керак, Арда Турон шу йилнинг 11 март куни Аслихон Дўған билан оила қурганди. Келин Туркия президенти Ражаб Тоййиб Эрдўғаннинг қизидир. Никоҳ ўқиш маросимида давлат раҳбари ва унинг турмуш ўртоғи гувоҳ сифатида иштирок этишганди.
