Хадемай ПРО-Лиганинг навбатдаги тур ўйинлари бўлиб ўтади. Чемпионат карвонбошчиси «Андижон» Суперлига йўлланмаси учун астойдил курашмоқда.

Илдар Сакаев бошқарувидаги «бургутлар» мусобақанинг 32-турида «Шўртан»га қарши баҳс олиб боради. Сафарда кечадиган мазкур учрашувга андижонликлар айни дамда ўз қароргоҳида юқори кайфиятда ҳозирлик кўрмоқда.

Мухлислар яхши билишса керак, Ғузорнинг «Шўртан» жамоаси «Андижон» учун доимо ноқулай рақиб бўлган. Хусусан, жорий йилнинг ўзида уч марта тўқнаш келган «Андижон» ва «Шўртан» баҳсида ғузорликлар икки бор муваффақият қозонган ва битта ўйинда томонлар дурангга имзо чеккан.

Буни яхши ҳис этиб турган «Андижон» жамоаси бўлажак ўйинда қандай бўлмасин фақат ва фақат ғалаба қозониш учун харакат қилади.

Эслатиб ўтамиз, «Шўртан» - «Андижон» учрашуви 29 октябр, душанба куни Ғузордаги «Марказий» стадионда соат 15:30да бошланади.

«Андижон» матбуот хизмати.