Швециялик машҳур мутахассис Свен Йоран Эрикссон Филиппин термаси бош мураббийлигига тайинланди, дея хабар берди ESPN.
70 ёшли мутахассис билан олти ойлик шартнома имзоланди. Келишувнинг қолган тафсилотлари ҳақида ҳозирча маълумот берилмаган. Филиппин футбол федерацияси раҳбарияти ушбу тайинлов терма жамоанинг АСЕАН чемпионати ва Осиё кубоги-2019даги имкониятларини оширишидан умидвор. Филиппин жамоасида ирландиялик Скотт Купер ҳам фаолият юритади.
Эслатиб ўтамиз, Эрикссон 2001-2006 йиллар мобайнида Англия термасини бошқарган, шунингдек, Мексика ва Кот-д`Ивуар миллий жамоаларида ҳам бош мураббийлик қилган. Бундан ташқари, швециялик мутахассис клуб футболида ҳам ўчмас из қолдирган. У “Гётеборг”, “Бенфика”, “Рома”, “Лацио”, “Манчестер Сити”, “Лестер” каби клубларда ишлаган.
