Туркманистон пойтахти Ашхобот шаҳрида оғир атлетика бўйича жаҳон чемпионатида бугун эркаклар 109 кг. вазн тоифасида баҳсларда иштирок этишмоқда. "А" гуруҳи вакиллари даст кўтариш бўйича ўз омадларини синаб кўришди.

Жаҳон ва олимпиада чемпиони, Осиё ўйинлари ғолиби — Руслан Нуриддинов, афсуски, даст кўтаришдаги уринишларини муваффақиятли бажара олмади. Руслан аввалдан илк уринишга 185 кг. буюртма берганди. Аммо мусобақа давомида буюртма 2 кг.га оширилди. Нуриддинов штангани кўтарди, аммо ҳакамларнинг икки нафари уринишни инобатга олмади.

Бу ҳолат ватандошимизга руҳий жиҳатдан салбий таъсир кўрсатди шекилли, у иккинчи ва учинчи уринишларда 189 кг.ли тошни кўтара олмади. Шу тариқа, Руслан Нуриддинов даст кўтаришда медалсиз қолди. Табиийки, у икки уриниш бўйича ҳам медалга эга чиқмайди.

Ўзбекистонлик спортчи энди силтаб кўтаришда муваффқиятга эришишга уриниб кўради. У дастлабки уринишга 225 кг.га буюртма берган.

Даст кўтаришда хитойлик Йанг Же 196 кг. билан олтин медални қўлга киритди. Иккинчи ўрин арманистонлик Симон Мартиросянга насиб этган бўлса (195 кг.), бронза медали россиялик Родион Бочковга тақдим этилади.

Бироз кейин силтаб кўтариш машқлари бошланади.