«ПСЖ» матбуот хизмати терма жамоалари сафида жароҳат олган Неймар ва Килиана Мбаппенинг ҳолати ҳақида маълумот берди.
Эслатиб ўтамиз, бразилиялик футболчи Камерунга қарши бўлиб ўтган ўйиннинг 8-дақиқасида мушагида оғриқни ҳис қилиб майдонни тарк этган бўлса, 19 ёшли франциялик ўйинчи Уругвайга қарши баҳсда елкаси билан йиқилиб, жароҳат олганди.
«Неймар ва Килиан Мбаппе бугун тиббий кўрикдан ўтишди. Неймарнинг чов қисмидаги мушаги чўзилган бўлса, Мбаппенинг ўнг елкаси лат егани аниқланди. Уларнинг кейинги ҳолатига 2 кунлик тикланиш жараёнидан кейин ойдинлик киритилади», – дейилади клуб баёнотида.
Эслатиб ўтамиз, Томас Тухель жамоаси 28 ноябрь куни Европа чемпионлар лигасининг 5-тури доирасида «Ливерпуль»га қарши баҳс олиб боради.