Халқаро теннис федерацияси (ИТФ) таснифига кўра, сербиялик Новак Жокович ва руминиялик Симона Ҳалеп 2018-йилнинг энг яхши теннисчилари деб топилди.

Жокович ИТФ таснфига кўра, йил теннисчи номини олти марта қўлга киритиб, бу борадаги рекордчи Пит Сампрасга етиб олди. Ҳалеп эса ушбу мукофотни биринчи маротаба қўлга киритди.

“Бу совринни яна бир бор қўлга киритиш мен учун улкан шараф. Совринларим сони Пит Сампрасники билан тенглашганидан хурсандман», — деди сербиялик теннисчи.

Бу йил Жокович тўртта совринни қўлга киритди. Хусусан, Уимблдон ва УС Опенъда ғалаба қозонди. Натижада АТП рейтингида 22-ўриндан 1-поғонага кўтарилди.

Ҳалеп эса ушбу мавсумда узоқ муддат WТА рейтингини бошқарди ва «Роланд Гаррос» ҳамда яна иккита мусобақада ғолибликни қўлга киритди.