«Тоттенҳэм Ҳотспур» бош мураббийи Маурисио Почеттино «шпорлар» мураббийлигида Англия Премьер-лигасида ажойиб натижа қайд этмоқда.
15 декабрь куни лондонликлар жамоаси 17-тур доирасида «Бёрнли»дан устун келди (1:0).
Opta маълумотига кўра, бу ғалаба аргентиналик мураббий Маурисио Почеттино учун «Тоттенҳэм» раҳбарлигидаги 100-ғалаба бўлди. Почеттино жамоани АПЛнинг 169 ўйинида майдонга бошлаб тушган.
Қайд этилишича, бундай натижага «Арсенал»нинг собиқ бош мураббийи Арсен Венгер ҳам эришган, аммо у 179 ўйинда 100-ғалабасини нишонлаган.
«Тоттенҳэм» 17 турдан кейин Премьер-лига турнир жадвалида 39 очко тўплаган ҳолда учинчи ўринда жойлашган. «Шпорлар»дан юқорида «Манчестер Сити» (44) ва «Ливерпуль» (42) жойлашган.
