«Ливерпуль» жамоаси янги бош мураббийнинг таништирув маросимини ўтказмоқда. Янги мураббийга савол беришди:
— Жозе Моуриньо ўзини «беназир» деб атайди, сизчи?
— Йўқ, мен беназир эмасман, лекин соппа-соғман!
Матбуот анжуманида кулгу кўтарилади...
Бу ҳаммамиз билган Клоппниниг «Ливерпуль»даги илк матбуот анжуманидан кичик иқтибос эди. Бугун замонавий футболдаги энг номдор мураббий Юрген Клопп ҳақида қисқача фактларни келтириб ўтамиз.
Юрген Клопп илк бор 23 ёшда профессионал футболда дебют қилади.
«Майнц» жамоасида аввалига ҳужумда, бир мавсумдан сўнг эса қанот ҳимоясида кўриниш беради. У бошқа клубда ўйнамайди. Ўз жамоасига содиқ мураббий карьерасининг охирги йилларида мураббийлик курсларида ўқишни бошлайди. У курсларга қатнаш учун кун ора 400 км йўлни босиб ўтишга мажбур бўлар эди.
«Майнц»да футболчилик билан ҳаммани ҳурматини қозонган Клопп футболчилик фаолиятини тугатгач, айнан шу жамоага мураббий бўлади. Аввалига «Майнц» Бундеслигага чиқиш учун курашда бир очкога енгилади. Кейинги мавсумда эса жуда узоқ кутилган Бундеслига эшикларини очишга муваффақ бўлади. «Майнц» 3 йил мобайнида у ерда қолади. Ҳатто Европа лигасида ҳам дебют қилишга улгуради. Клопп «Майнц»да 3 йил ишлайди ва жамоаси билан хайрлашиб, мураббийлик фаолиятини қисқа муддатга тўхтатади.
5 ойлик танаффусдан сўнг унга икки клубдан бирданига таклиф тушади. Бири Леверкузен шаҳрининг "Байер", яна бири Дортмунднинг "Боруссия" клуби. Қизиғи шундаки, Клопп камроқ маош белгилаган, молиявий қийин аҳволда қолган Бундеслигада 13-ўринда бораётган "Боруссия"ни танлайди. Ўша мавсум Клопп Бундеслигада финишга бешинчи бўлиб етиб келади.
У "Боруссия"даги илк мавсумида шогирдларини 5 кунга озиқ-овқатсиз, сувсиз ўрмонда олиб қолади. Ўша даврлар ҳақида Левандовски ва Ройс кўп бор интервьюларида завқланиб айтиб ўтишган. Аввалига жамоани Бундеслигада ўз ўрнини топишга ёрдам берган Клопп секин-аста, "сариқ-қоралар"ни топ-клубга айлантириб юборади.
Бундеслигада икки бор муддатидан аввал чемпионликни қўлга киритган Клопп Чемпионлар лигасидаги финалини аламли тарзда бой беради. Сўнг "Боруссия"даги шогирдларини раҳбарият кўтарасига сотишни бошлаб юборади. Энг алам қиладигани, асосий рақиблари «Бавария» уларни шу йўл орқали сезиларли даражада анча ожизлаштириб юборади. Клопп раҳбарият унинг футболчиларини сотишини томоша қилиб тура олмайди ва жамоани тарк этади.
Клопп жаҳон футболига Левандовски, Ройс, Гётце, Обамеянг, Ҳуммелс сингари суперюлдузларни тарбиялаб берган. Дортмунд шаҳри ўз қаҳрамонини муносиб кузатади. Унинг охирги ўйинига стадион атрофида минглаб мухлислар йиғиладилар. Улар ичкарига кира олишмайди, сабаби стадион аллақачон мухлислар билан лиқ тўла эди. Ўша куни "Сигнал Идуна Парк"га йиғилган мухлислар тик турганча, кўзлари ёшга тўлиб дунёнинг энг кучли мураббийини олқишлаб кузатишган эди...
