«Барселона» клуби «Сассуоло» бош мураббийи Роберто Де Дзербига қизиқиш билдирмоқда. Бу ҳақда Corriere dello Sport хабар тарқатди.
Манбага кўра, "кўк-анорранглилар" вакиллари бир қанча вақтдан бери «Сассуоло»нинг ўйинларини кузатиб келишмоқда. Италиялик мутахассис томонидан тақдим қилинаётган ҳужумкор ўйин услуби каталонияликларга маъқул келмоқда.
«Барселона»нинг ҳозирги бош мураббийи Эрнесто Вальверденинг шартномаси ушбу мавсум сўнгида якунига етади. Клуб ҳозирча ушбу мураббийга янги шартнома таклиф қилмади. Де Дзерби эса 2019 йилнинг ёзида "Барса" бош мураббийига айланиши мумкин.
39 ёшли Де Дзерби 2018 йилнинг ёзида «Лас-Пальмас» устозига айланиши мумкин эди, аммо у «Сассуоло»ни танлади. Ушбу жамоа Италия чемпионатининг 17-туридан сўнг 25 очко билан жадвалда 8-ўринни эгаллаб турибди.













