Янги йилнинг биринчи кунидан бошлаб қишки трансферлар бозори очилади.
Ушбу қисқа давр оралиғида футболчилар ўз жамоаларини ўзгартира олишади, жамоалар сафларига ўзлари истаган футболчиларни қўшиб олишлари мумкин.
Трансферлар ойнаси очилган вақтда “Манчестер Юнайтед”дан кетиш эҳтимоли катта бўлган футболчилар ҳақида гаплашамиз.
Жозе Моуриньо истеъфога чиқарилганидан сўнг, кўплаб футболчилар жамоада қолишни истаб қолишди.
Лекин, шундай бўлсада жамоасини ўзгартиришга қаршилик билдирмайдиган футболчилар йўқ эмас.
Алексис Санчес
Ушбу футболчи “Арсенал”дан “МЮ”га келганида барча уни ҳақиқий “7” рақамга мос келадиган ҳужумчи дея тахмин қилганди. Бироқ, унинг феъл-атвори барчасини ўзгартириб юборди. Аввалига Моуриньо, кейинчалик жамоадошлари билан муроса қилолмаган чилилик футболчи бора-бора асосий таркибдаги ўрнини бошқа футболчига топшириб қўйди.
Шубҳасиз, Санчес қишда жамоасини ўзгартиради, чунки унга кўплаб гранд клублар қизиқиш билдирмоқда. Шундай таклифлар келиб турганда, у заҳира ўриндиғини танламаса керак.
Санчесга қизиқиш билдираётган клублар: ПСЖ, “Реал”, “Милан”, “Интер”.
Кетиш эҳтимоли: ПСЖ
Маркос Рохо
Бу футболчини жароҳатлар синдирди десак адашмаган бўламиз. Келажаги порлоқ аргентиналик ҳимоячини ўз вақтида Дэвид Мойес жамоага олиб келган эди. Шу вақт ичида Рохо асосий таркиб ўйинчиси сифатида ўйнаб келди. Аммо жароҳатлар унинг равнақига ҳалақит берди. Кетма-кет ўйинларда ўзини кўрсата олмаганидан кейин. Жозе Моуриньо унинг ўрнини кўрсатиб қўйди, ҳозирда футболчининг спорт формаси яхши эмас. Қолаверса, унинг ўзига келиб олиши учун ҳам имконият йўқ. Шунинг учун, қишда Рохо жамоасини ўзгартирса ажабмас.
Рохога қизиқиш билдираётган клублар: “Эвертон”, “Вулверхэмптон”.
Кетиш эҳтимоли: “Вулверхэмптон”.
Маттео Дармиан
Онда-сонда асосий таркибда майдонга тушадиган италиялик ҳимоячини ҳафсали пир бўлган бўлса, ажабмас. Манкунианликлар сафига 2015 йил қўшилган бўлса-да футболчи ҳали рўзи-рўшнолик кўргани йўқ. Оғир жароҳатлар футболчини руҳияти таъсир қилгани боис у доим асосий таркибдан четда қолади.
Шунинг учун, Дармиан фаолиятини АПЛда давом эттира олмай, қишда “МЮ”ни тарк этади.
Дармианга қизиқиш билдираётган жамоалар: “Ювентус”, “Милан”, “Интер”, “Рома”.
Кетиш эҳтимоли: “Милан”.
Эрик Байи
Ушбу футболчи ҳам янги “МЮ”га кераги қолмаган кўринади. Гарчи, асосий таркиб ўйинчиси бўлса-да кот-д’ивуарлик футболчи охирги вақтларда фақат зарар олиб келяпти. Жароҳатидан энди фориғ бўлган Байи ҳимояда кескин хатоларга йўл қўётгани мураббийлар штабига ёқмаяпти. Шунинг учун, қишки трансферлар вақтида раҳбарият Байидан қутулиш пайида бўлиши аниқ.
Байига қизиқиш билдираётган клублар: ПСЖ, “Милан”, “Валенсия”
Кетиш эҳтимоли: Милан
Хуан Мата
Испаниялик тажрибали ярим ҳимоячи жорий мавсум “МЮ”нинг жонига жуда кўп маротаба оро кирди. Хаттоки Моуриньони истеъфодан сақлаб қолган эди (“Ньюкасл”га қарши ўйин 3:2). 30 ёшли футболчи ҳозирда заҳира ўйинчисига айлани қолган ва умуман жамоадаги ўрнидан норози бўлмоқда. Мата кўпроқ ўйин амалиётига эга бўлишни истамоқда. Агарда унинг талаби бажарилмаса у ҳам қишда жамодонини йиғиштиришига тўғри келади.
Матага қизиқиш билдираётган клублар: “Реал”, “Валенсия”
Кетиш эҳтимоли: Номаълум.
Андер Эррера
Яна бир заҳира ўриндиғида “михланиб” қолган испаниялик иқтидор соҳиби. Қишда жамоасини ўзгартириш эҳтимоли бошқаларга қарганда юқорироқ. У ҳеч нарсадан нолимайди. Бироқ, ватан соғинчи туфайли у Испанияга қайтишга қаршилик билдирмайди.
Кетиш эҳтимоли: “Атлетик Бильбао”
“МЮ”га келиш эҳтимоли юқори бўлган футболчилар.
Дуглас Коста (“Ювентус”)
Туринда иши юришмаётган бразилиялик футболчи “қизил иблислар”нинг ҳужум чизиғини кучайтириб бериши кутилмоқда. Индивидуал маҳорати юқори бўлган ҳужумчини “кекса синьора” осонликча қўйиб юбормайди. Лекин, “МЮ” қишда ушбу футболчини қўлга киритиш учун қўлидан келган барча ишни қилиши аниқ.
Трансфернинг тахминий нархи: 80 млн евро
Тони Кроос (“Реал”)
Манкунианликлар қишда яна бир катта трансферга қищда уришлари мумкин. Жозе Моуриньо ҳам ушбу футболчига қизиқиши юқори эди. Унинг тажрибаси ва ақлли ҳаракатлари португалиялик мутахассисни ҳайратда қолдирган бўлса ажабмас. Ҳозирда Кроос кўпинча заҳирада қолиб унинг ўрнига Дани Себальос ўйнаяпти. Тони ўзини кучини синаб АПЛда синаб кўриш эҳтимоли бор. “Манчестер Юнайтед” эса унинг даражасига мос тушадиган клуб деса бўлади.
Трансфернинг тахминий нархи: 95 млн евро
Костас Манолас (“Рома”)
Манолас “Манчестер Юнайтед”га энг керак бўлган футболчилардан бири. Чунки, “қизил иблислар”нинг ҳимоя чизиғи ҳали-ҳануз оқсаган. Ўртамиёна клублар ҳам бемалол ҳимоя қўрғонини бузиб кира олади. Шунинг учун, раҳбарият грециялик футболчини биринчи бўлиб ўз сафига қўшиб олишни режалаштирмоқда. Қолаверса, “Рома”нинг чемпионатда ишлари яхши эмас “бўрилар” раҳбарияти ҳам ушбу футболчини қўйиб юборишга қарши эмас.
Трансфернинг тахминий нархи: 35 млн евро
Николя Пепе (“Лиль”)
“Лиль”да ўйнаб юрган ушбу йигитча “қизил иблислар”нинг қизиқиш доирасига тушиб қолди. Пепе сермаҳсуллик бобида фақатгина Мбаппедан ортда қолмоқда унинг статистикаси унинг келажаги порлоқ эканлигидан далолат беради. Ушбу футболчига нафақат “МЮ” балки, бошқа гранд клублардан таклиф келмоқда. Бироқ, манкунианликлар Николяни кўпроқ қўлга киритишни истамоқда.
Трансфернинг тахминий нархи: 80 млн евро
Эдер Милитао (“Порту”)
“Манчестер Юнайтед” ҳам “Реал” каби ушбу футболчига қизиқиш билдирмоқда. Манкунианликларни ҳимоя чизиғида муаммолар талайгина. Шунинг учун, раҳбарият янги иқтидорларни излаш пайига ўтди. Шулардан бири, Милитао 20 ёшли ҳимоячи ўзининг ҳаводаги курашлари билан, қатъиятли ўйини билан скаутларни назарига тушиб қолган.
Айнан, қишда “МЮ” ушбу футболчини жамоага олиб келишни режалаштириб қўйган. “Порту” ҳам ушбу футболчини мўмайгина пулга пулашга қарши эмас.
Трансфернинг тахминий нархи: 40 млн евро
Аброр Эшонхонов
