Акмал Эшонхонов
Шаржа шаҳридан махсус
Ўзбекистон МТЖ бош мураббийи Эктор Купер Осиё Кубогидан ўрин олган Уммонга қарши ўйиндан кейин ўз фикрларини билдириб ўтди.
“Уммон кучли ўйнади. Кўп вазиятларда тўпни рақибдан олиб қўйишга қийналдик. Икки хил тайм ўтказдик. Биринчи бўлимда яхши ҳаракат қилгандик. Аммо иккинчи таймда устунликни рақибга бериб қўйдик. Уммон ўйинни назорат қила олди. Биз ҳудудларни ёпишга қийналдик, рақиб эса бундан унумли фойдаланди.
Лекин ҳисоб тенглашгандан кейин ғалаба қозонишимизга ишонч бор эди. Осиё Кубогини ғалаба билан бошлаганимиздан хурсандман. Терма жамоа аъзолари жисмоний жиҳатдан яхши формадалар. Шунчаки бугун биринчи ўйин бўлгани учун бир оз асабийлашдилар.
Биз ўйинда тўпни назорат қила олмаганимиз учун ҳам кўп югуришга, кўп куч йўқотишга мажбур бўлдик. Кейинги ўйинларда бу хатоларимизни тўғирлашга ҳаракат қиламиз. Гол киритилган вазиятда икки футболчи аъло даражада ҳаракат қилди.
Лекин мен ҳар доим жамоавий ўйинга эътибор қаратаман. Футболчиларга алоҳида баҳо бермайман. Ютса, бутун жамоа ютади.
Баъзи футболчиларни олдимга чақириб, уларга алоҳида кўрсатма беришим мумкин, лекин доимо уларни бир жамоа бўлиб ҳаракат қилишга чақираман", - дейди Купер.
