Осиё Кубоги гуруҳ босқичи сўнгги турида Ўзбекистон миллий жамоасига қарши кечган баҳсдан сўнг Япония бош мураббийи Хажиме Мориясу ўз фикрларини билдириб ўтди.
"Ўйлайманки ўтказиб юборилган голдан сўнг тезда вазиятни ўнглай олдик. Мусобақа бошланиши олдидан жамоамизни бирдам бўлишга келишиб олган эдик. Биз бу ердамиз ва гуруҳдаги барча ўйинда ғалаба қозонишга муваффақ бўлдик. Ўйлайманки, мусобақа охирига қадар мана шундай бирдам бўламиз. Жамоамиз жисмоний жиҳатдан яхши имкониятга эга.
Ўзбекистонга қарши кечган ўйин биз учун синов бўлдими? Йўқ, биз бу ўйинга синов сифатида қарамадик. Ўтказилган голдан сўнг футболчиларимиз ўзини йўқотиб қўймади ва хотиржамлик билан ҳисобни тенглаштирди. Жамоамиз бутун мусобақага тайёрланган ва ғалаба қозониш учун дадил боришни мақсад қилганмиз.
Нимчорак финалда бизга рақиб Саудия Арабистон бўладими ёки Қатарми, у қадар фарқи йўқ. Ҳар иккиси ҳам кучли рақиб.
Фақат иккинчи бўлим эмас, балки бутун ўйин давомида ҳимоядан ҳужумга ўтишда яхши ҳаракат қилдик. Биз ўз имкониятларимиздан фойдаландик", -дейди мутахассис.
