Ўзбекистон миллий жамоаси Осиё кубоги мусобақасининг нимчорак финал босқичи доирасида Австралияга қарши баҳс олиб боради. "Пахтакор" сафида ўйнаган австралиялик футболчи Ростин Гриффитс Ўзбекистон терма жамоаси ҳақида ўз фикрини билдириб ўтди. Ушбу футболчи ҳозирда "Мельбурн Сити" шарафини ҳимоя қилмоқда.

"Ўзбекистонга паст назар билан қараб бўлмайди. Бу жамоа сафида бир қатор иқтидорли футболчилар бор. Бу жамоа Австралияга жиддий рақиб бўлади, улрани осон енгиш мумкин эмас.

Авваллари бу термага яхши мураббий етишмасди. Хорижлик мураббий келиши билан бу камчиликни бартараф этилди. Ўзбекистон футболи ҳозир ривожланмоқда, футболга катта пуллар тикилмоқда. Шу пайтгача улар ортда қолишаётганини тушуниб туришганди. Купер қўлостида мамлакатнинг энг яхши футболчилари йиғилган", — деди австралиялик футболчи.

Ҳужумчи Элдор Шомуродов Осиё кубогида 4та гол уриб, тўпурарлар пойгасида иккинчи ўринни эгаллаб турибди. Хўш, "Ростов" футболчиси терма жамао етакчиси ҳисобланадими?

"Элдор — яхши ўйинчи. Аммо у етакчи эмас. Одил Аҳмедов — мен учун ҳақиқий хавфли ўйинчи. Терма жамоа ўйини у орқали ташкил қилинади. У Ўзбекистоннинг ҳақиқий етакчиси. У катта мусобақларада иштирок этган. Ҳозирда Хитойнинг энг кучли жамоаларидан бирида ўйнаётгани — бунинг исботи.

Ўзбекистон терма жамоаси сафида бир неча нафар футболчилар билан бирга ўйнаганман. Жалолиддин Машарипов — ҳозирда Ўзбекистон сафидаги энг тезкор ва техник жиҳатдан кучли футболчи.

Шунингдек, Егор Кримецни ҳам таъкидлаган бўлардим. Унинг тезлиги юқори эмас ва қизил карточка олишга мойил ўйинчи. Аммо у "соккеруз"га кўп ташвиш келтирса керак.

Агар тезкор гол уриб олсак, ишимиз осон бўлади. Агар Ўзбекистон биринчи бўлиб гол урса, тактик жиҳатдан ўйинни "ўлдириб", бизга жиддий муаммо яратишади", — деди Гриффитс.

"Ҳозирда ўзбек футболига кўп пул тикилмоқда. Ўзбекистон U23 терма жамоаси ўтган йили Осиё чемпионлигини қўлга киритди. Улар мамлакатга қайтганидан кейин ҳар бир футболчига янги машина ва 50.000 доллардан пул беришди. Ўзбек футболида яхши ўйинчилар ҳамиша кўп бўлган, фақат яхши мураббий етишмас эди", — деди футболчи.

Гриффитс фаолияти давомида Ўзбекистондан ташқари, Хитой, Голландия, Шотландия ва англияда ўйнаган. Аммо Тошкентдаги ҳаёт унга кўпроқ ёққан.

"Бошиданоқ Тошкент менга ёқиб қолди. Барчаси ажойиб эди. Аммо биз ўрганиб қолган кўп нарсаларни у ерда топиш қийин. Масалан, McDonald's, Shell ёки BP йўқ. Шу боис, айрим нарсаларда қийинчиликка дуч келдим. Тил билан боғлиқ тўсиқ эса мен учун энг катта қийинчилик бўлди. У ерда деярли ҳеч ким инглиз тилида гапирмайди. Турмуш ўртоғим ҳомиладор бўлганини билган заҳотим шартномани узайтира олмаслигимни тушундим ва Австралияга қайтдим", — дея ўз фикрлари билан ўртоқлашди Ростин Гриффитс.