Испания Ла лигасининг 20-тури доирасида "Реал" ўз майдонида "Севилья"ни қабул қилди. Ушбу жамоалар тур олдидан 33 очко билан жадвалда 3 ва 4-ўринларни эгаллаб туришганди.

Биринчи бўлимда жамоалар тенгма-тенг ўйин намойиш қилишди. Дастлабки 45 дақиқа давомида андалусияликлар ҳисобни очиш учун жуда яхши имкониятга эга бўлишди. Эскудеро яккама-якка вазиятга чиқиб бориб, Куртуа қўриқлаётган дарвоза томон аниқ зарба бера олмади.

Иккинчи бўлимда эса Солари шогирдлари босимни оширишди, кетма-кет ҳужумлар ташкил қилишди, кўплаб зарбалар йўллашди. Якунда "Қироллик клуби" ўз мақсадига етишди. Баҳс тугашига 12 дақиқа қолганида Каземиро кучли зарба бериб, ҳисобни очишга муваффақ бўлди. Учрашувга қўшиб берилган дақиқаларда эса Модрич ҳимоячиларнинг хатосидан унумли фойдаланиб, ўйинга нуқта қўйди.

Ушбу ғалабадан кейин "Реал" ўз очколарини 36тага етказиб, Ла лига жадвалида 3-ўринга кўтарилиб олди.

Испания Ла лигаси, 20-тур
Реал Мадрид – Севилья 2:0 (0:0, 2:0)
Голлар: 1:0 – 78 Каземиро, 2:0 – 90 Модрич.
Реал Мадрид – Куртуа, Варан, Регилон, Карвахаль, Рамос, Себальос (Вальверде, 88), Каземиро, Васкес (Иско, 77), Модрич, Винисиус Жуниор, Бензема.
Севилья – Вацлик, Кьер, Гомес, Эскудеро (Сальватьерра, 86), Каррису, Банега, Навас, Васкес, Сарабия, Андре Силва (Мунир, 75), Бен-Йеддер (Промес, 71).
Огоҳлантиришлар: Каррису (30), Банега (54), Каземиро (61), Себальос (65), Кьер (85).