Янги мавсумга қизғин ҳозирлик олиб бораётган Бекободнинг “Металлург” жамоаси аъзолари бугун тонгда Туркияга учиб кетишди.
Бекободликлар Анталия шаҳрида икки ҳафталик йиғинда бўлишади. Йиғин давомида жисмоний тайёргарликни тиклаш баробарида бир нечта кўрик назорат учрашувлари ўтказилиши режалаштирилган. Олдиндан келишувга биноан “Металлург”нинг сафардаги рақиблари Арманистон, Қозоғистон ҳамда Туркия жамоалари бўлади. Жумладан, 5 февралда бекободликлар Қозоғистоннинг “Акжайик” жамоасига қарши баҳс юритишади.
Таъкидлаш жоизки, сафарга кетиш арафасида “Металлург” сафига дарвозабон Александр Лобанов келиб қўшилди. Шунингдек, бекободликлар Зафар Сафаев, Муҳаммад Исаев, Зоҳид Абдуллаев сингари тажрибали ўйинчилари билан шартнома муддатини узайтиришди.
Туркиядаги йиғин 27 январдан 11 февралга қадар давом этади.
