Айни дамда Тошкентда йиғин ўтказаётган “Андижон” кунига икки маҳалдан машғулот олиб бормоқда.

Эрталабки машғулотлар “NBU-Осиё” стадионида жисмоний тайёргарлик бўйича ўтказилаётган бўлса, кечки машғулотлар “Турин” стадионида асосан техник-тактик жиҳатлар устида олиб борилмоқда.

Аввал хабар берганимиздек, бундан бир неча кун аввал “бургутлар” йиғинига тажрибали футболчи Қаҳрамон Баҳодиров билан иқтидорли ярим ҳимоячи Алишер Мирзаев келиб қўшилганди. Улардан кейин “Бухоро” жамоасидан Бобур Омонов ҳам “Андижон”нинг йиғинига қўшилди. 29 ёшли ҳимоячи ҳозирда жамоа машғулотларида иштирок этиб, ўзидан илиқ таассурот қолдиришга харакат қилмоқда.

Ундан ташқари бугун қирғизистонлик Миролимжон Аҳмедов ҳам андижонликларнинг лагерида пайдо бўлганини айтиш мумкин.
Юқорида номлари келтириб ўтилган футболчиларни мураббийлар штаби Тошкент йиғини чоғида ўтказиладиган синов-назорат ўйинларида кўздан кечиради.

Маълумот учун “Андижон” жамоаси 30 январ куни “Бунёдкор”, 3 феврал куни эса “Қизилқум” билан ўртоқлик учрашувида майдонга тушади.
Дарвоқе, маълум муддат жамоа кўригида бўлган молдавиялик Илиэ Дамасчан, Вадим Калугхер ва украиналик Андрей Пашенко сингари легионерларга жавоб бериб юборилди.

Ҳозирда таркибни кучайтириш мумкин бўлган бир қатор футболчилар билан музокара давом этаётганини айтиш лозим.

“Андижон” матбуот хизмати.