Ўзбекистон футбол ассоциацияси мамлакатимизда болалар футболини ривожлантириш бўйича бир қатор чора-тадбирларни амалга ошириб келмоқда.   Жумладан, "Чиғатой" спорт мажмуасида ЎФА қошидаги болалар футбол мактаби фаолият юритаётган бўлиб, бу ерда истеъдодли болажонлар Зайниддин Тожиев, Ҳикмат Ҳошимов, Элдор Магдеев каби ўтмишнинг юлдузлари қўлостида футбол сир-асрорларини ўрганишмоқда.    Ушбу футбол мактабида 6 ёшдан 18 ёшгача бўлган 300 нафарга яқин болажонлар машғулотлар олиб боришлари учун барча шарт-шароитлар муҳайё қилинган. Жумладан, ЎФА томонидан "FIFA Forward" дастури асосида мазкур мажмуада янги сунъий қопламали майдон барпо қилинган бўлиб, бу майдонда болажонлар исталган об-ҳаво шароитида машғулот ўтказишлари ва назорат учрашувларида майдонга тушишлари мумкин. ЎФА томонидан мазкур футбол мактаби тарбияланувчиларига экипировкалар тақдим қилинган бўлиб, барча ёш тоифасидаги гуруҳлар мазкур экипировкаларда машғулотлар олиб боришмоқда.   Умид қилиб қоламизки, бу ерда футбол билан шуғулланаётган ёшлар келгусида терма жамоаларимиз сафида халқаро майдонларда Ватанимиз шаънини муносиб ҳимоя қилишади.