Осиё кубогининг финал ўйинига ўзбекистонлик ҳакамлар гуруҳи тайинланди. Япония ва Қатар терма жамоалари ўртасидаги учрашувни Равшан Эрматов бошчилигидаги ҳакамларимиз бошқариб боришади.
ФИФА реферисига қанотларда Абдуҳамидулло Расулов ва Жаҳонгир Саидов ёрдам беришади.
Мусобақа давомида Эрматов Сурия - Фаластин (гуруҳ босқичи, 1-тур), Вьетнам - Яман (3-тур), Япония - Саудия Арабистони (нимчорак финал), Жанубий Корея - Қатар (чорак финал) баҳсларида бош ҳакам сифатида ишлаганди. Финал эса унинг турнирдаги бешинчи ўйини бўлади.
Эслатиб ўтамиз, Равшан Эрматов Осиё кубоги-2011 (Австралия - Япония) финалини ҳам бошқарганди.
Осиё кубоги-2019. Финал
ЯПОНИЯ - ҚАТАР
Бош ҳакам: Равшан Эрматов (Ўзбекистон)
Қанот ҳакамлари: Абдуҳамидулло Расулов ва Жаҳонгир Саидов (иккиси — Ўзбекистон)
Захира ҳаками: Ма Нинг (Хитой)
Видео ассистент ҳакам: Паоло Валери (Италия)
Видео ассистент ҳакам ёрдамчилари: Муҳаммадд Тақи Бин Жаҳари (Сингапур) ва Кристофер Бит (Австралия)
