Ўзбекистон футбол ассоциацияси (ЎФА) қарорига асосан, “Навбаҳор” клуби ярим ҳимоячиси Азизбек Турғунбоевнинг шартнома борасида “Пахтакор” ва “Навбаҳор” жамоалари ўртасида юзага келган муаммолар сабабли, футболчи Турғунбоев 9 июлгача,  у билан биргаликда ҳар икки клуб мутасаддилари, жумладан, “Навбаҳор” ПФК вице-президенти Шамшод Сариков ҳамда клуб директори Расулжон Акрамов 6 ой муддатга футболга оид ҳар қандай фаолиятдан четлаштирилишганди.

ЎФАнинг мазкур қарори ижросини таъминлаш бўйича бугун “Навбаҳор” ПФК анжуманлар залида йиғилиш ўтказилди. Уни Наманган шаҳар ҳокими, “Навбаҳор” ПФК президенти Шавкат Абдураззоқов олиб борди. Шавкат Шокиржанович ўз сўзида ЎФА муаммоли вазиятда “Пахтакор” ва “Навбаҳор” клубларини жазолаб, тўғри иш қилганлиги, олдин бундай вазиятларга кўз юмиб кетилганлигини таъкидлаб, ушбу қарор бўйича “Навбаҳор” ПФК раҳбариятида ўзгариш қилиш лозимлигини таъкидлади.

Шундан сўнг, ташкилий масала кўрилди. “Навбаҳор” ПФК вице-президенти лавозимига шу пайтгача Ўзбекистон ва Россиядаги кўплаб давлат корхоналари ҳамда ташкилотларида раҳбарлик лавозимларида фаолият юритган Бахтиёр Исоқжонович Усманов тайинланди.

“Навбаҳор” ПФК клуби директори этиб, шу пайтгача “Навбаҳор” ПФК қошидаги “Навбаҳор-Умид” футбол мактаби директори лавозимида фаолият юритган Акмал Маматович Раҳмонов тайинланди.

Наманган шаҳар ҳокими, “Навбаҳор” ПФК президенти Шавкат Абдураззоқов ҳар икки янги сайланган раҳбарга янги лавозим ва ишларида омад, шунингдек, “лочинлар”нинг янги мавсумда ўз олдига қўяётган юксак мақсади, яъни мамлакат чемпионлигини қўлга киритиш йўлида муваффақият ёр бўлишини тилади.

“Навбаҳор” ПФК матбуот хизмати.