O‘zbekiston futbol assosiasiyasi (O‘FA) qaroriga asosan, “Navbahor” klubi yarim himoyachisi Azizbek Turg‘unboyevning shartnoma borasida “Paxtakor” va “Navbahor” jamoalari o‘rtasida yuzaga kelgan muammolar sababli, futbolchi Turg‘unboyev 9 iyulgacha,  u bilan birgalikda har ikki klub mutasaddilari, jumladan, “Navbahor” PFK vise-prezidenti Shamshod Sarikov hamda klub direktori Rasuljon Akramov 6 oy muddatga futbolga oid har qanday faoliyatdan chetlashtirilishgandi.

O‘FAning mazkur qarori ijrosini ta’minlash bo‘yicha bugun “Navbahor” PFK anjumanlar zalida yig‘ilish o‘tkazildi. Uni Namangan shahar hokimi, “Navbahor” PFK prezidenti Shavkat Abdurazzoqov olib bordi. Shavkat Shokirjanovich o‘z so‘zida O‘FA muammoli vaziyatda “Paxtakor” va “Navbahor” klublarini jazolab, to‘g‘ri ish qilganligi, oldin bunday vaziyatlarga ko‘z yumib ketilganligini ta’kidlab, ushbu qaror bo‘yicha “Navbahor” PFK rahbariyatida o‘zgarish qilish lozimligini ta’kidladi.

Shundan so‘ng, tashkiliy masala ko‘rildi. “Navbahor” PFK vise-prezidenti lavozimiga shu paytgacha O‘zbekiston va Rossiyadagi ko‘plab davlat korxonalari hamda tashkilotlarida rahbarlik lavozimlarida faoliyat yuritgan Baxtiyor Isoqjonovich Usmanov tayinlandi.

“Navbahor” PFK klubi direktori etib, shu paytgacha “Navbahor” PFK qoshidagi “Navbahor-Umid” futbol maktabi direktori lavozimida faoliyat yuritgan Akmal Mamatovich Rahmonov tayinlandi.

Namangan shahar hokimi, “Navbahor” PFK prezidenti Shavkat Abdurazzoqov har ikki yangi saylangan rahbarga yangi lavozim va ishlarida omad, shuningdek, “lochinlar”ning yangi mavsumda o‘z oldiga qo‘yayotgan yuksak maqsadi, ya’ni mamlakat chempionligini qo‘lga kiritish yo‘lida muvaffaqiyat yor bo‘lishini tiladi.

“Navbahor” PFK matbuot xizmati.