Аввалига, Марко интервью беришдан бош тортди. Сабабини сўраганимда кулиб : «Менинг тилим куйган, ўтган йили саралаш ўйинларида интервью бергач жамоамиз ютқазиб қўйган эди», - деди. ҳазил-ҳузул билан уни кўндирдик ва саволларимизга жавоб олдик.
Марко эртанги учрашувда жамоани ким сардор сифатида майдонга олиб тушади?
- Менимча, Шер( Шерзод Аъзамов) ёки Криметс. Бу икки йигитларнинг иккиси ҳам сардорликка лойиқ.
Тиаго Баззеранинг кетиши жамоанинг ўйинига салбий таъсир ўтказадими?
- Албатта, бундай футболчининг йўқлиги жамоага таъсирини ўтказмай қолмайди. Мен у билан Ўзбекистонга келишимдан аввал ҳам битта лигада бирга ўйнаганман. У кучли футболчи лекин, айтишадику «алмаштириб бўлмас инсон бўлмайди», - деб!
Марат Бикмаев Тиагонинг ўрнини боса оладими?
- Бундай саволлар берманг (кулади)! Икки футболчи ҳам ўз ўйин услубига эга. Маратнинг жамоамизга келиши бизни кучайтиради деган умиддаман.
Рақибингиз «Эйр Форс» клуби жамоавий футбол ўйнайди. Улар қаторасига 3 бор АФК кубогида ғолиб чиқишди. Сизнингча жамоаларнинг эртага бўлиб ўтадиган учрашувда имкониятлари қандай?
- Бу футбол, унда доим 11 га 11 ўйналади. Ҳозирча жамоаларнинг имконияти ҳақида бир нима дейиш қийин…
Яъни кучлар тенг демоқчимисиз?
- Келинг рақибларга ҳурмат юзасидан 50/50 дея қоламиз.
Мана юртимизда бир неча йилдан бери тўп тепмоқдасиз. Сизнингча Ўзбекистондаги энг иқтидорли ёшфутболчи ким?
- Юртингизда иқтидорли ёшлар талайгина. Мен миллий чемпионатда бир нечта яхши ўйинчиларни кўрдим.
Айнан кимни энг иқтидорли деб атаган бўлардингиз?
- Агар биттасини танлаш керак бўлса, менимча, бу Жасур Яхшибоев. Унинг техникаси ва тезлиги ҳимоячиларни шошириб қўйди.
Сизнингча Жасур нима учун ўз имкониятларини тўлиқ намоён қила олмаяпти?
- О, бундай саволларга жавоб бериш қийин. (Кулади) Келинг, ўзидан сўрай қолинг.
Асосий таркибга кира олмаётганига қандай изоҳ берасиз?
Менимча бу саволга жавоб беришга ҳаққим йўқ.
Майли бошқа мавзуга кўчамиз. Жароҳатингиз ҳақида. Неча кунда сафга қайтасиз?
- Докторларимиз 1 ой дейишмоқда. Менимча 3 ҳафта ичида тўлиқ тиклансам керак.
Эртанги учрашув олидадан мухлисларга гапингиз бўлса марҳамат.
- Эртанги ўйин олдидан мухлисларимизга бизга ишонинг демоқчиман. Уларнинг ишончи ва қўллаб-қувватлаши биз учун жуда ҳам муҳим. Биз улар учун майдонга чиқамиз. Эртанги учрашувда стадионда бизга руҳан далда бўлиб туришса, ҳурсанд бўлар эдик.
Яҳёхўжа Улуғхўжаев суҳбатлашди.
