Хориждаги бир неча йиллик фаолиятдан кейин Ўзбекистонга қайтиб, «Металлург» аъзосига айланган яримҳимоячи Сервер Жепаров жисмоний тестдан ўтолмади. Tribuna.uz манбаси хабар беришича, у энди Суперлигада иштирок этмаслиги мумкин.
17 февраль куни «Металлург» футболчилари Ўзбекистон Футбол Ассоциацияси томонидан тасдиқланган 30 метрга югуриш, узунликка сакраш, 7х50 метрга югуриш ва «Yо-Yо» тест-синовларини топширишган. Уни техник ривожлантириш бошқармаси илмий-методик бўлими раҳбари Шамил Исеев қабул қилиб олган.
Ўзбекистон терма жамоасининг 36 ёшли яримҳимоячиси Сервер Жепаров эса тест синовларидан муваффақиятли ўтолмаган.
«Металлург» клубининг тест-синовларга бағишланган 17 февраль кунги ҳисоботида бу ҳақда ҳеч қандай маълумот берилмаган.
Қоидага кўра, тест-синовларидан ўтолмаган футболчи учун янги мавсум бошлангунга қадар яна бир имконият берилади. Агар ундан ҳам ўтолмаса, футболчи ёзги тест-синовларигача футболдан четлатилади.
Эслатиб ўтамиз, Сервер Жепаров аввалги мавсумни Қозоғистоннинг «Жетису» клубида ўтказган эди. 2018 йил декабрь ойида тажрибали футболчи «Металлург» билан шартнома имзолади.
Бугун, 21 февраль куни «Металлург» клуби «Миллий» стадион анжуманлар залида янги ўйинчиларнинг тақдимот маросимини ўтказди. Уларнинг орасида Сервер Жепаров ҳам бор эди.
