Лондоннинг "Челси" клуби бош мураббийи Маурицио Сарри дарвозабон Кепа Аррисабалага билан боғлиқ можаро қандай ҳал қилинганини айтиб берди.
Эслатиб ўтамиз, испаниялик посбон Лига Кубоги финалидан ўрин олган "Манчестер Сити"га (0:0, пен. 3:4) қарши ўйинда захирага олинишини истамай, майдонда қолган эди.
"Кепа билан шахсан гаплашдим, кейин барча футболчилар билан суҳбатлашдик. У ҳаммадан узр сўради. У жуда катта хатони қилди, бироқ, уни ўлдирмоқчи эмасмиз.
"Тоттенҳэм"га қарши ўйинда майдонга тушадими? Билмадим, балки ҳа, балки йўқ. Бу ҳақда қарор қабул қилмадим", - деб Сарри сўзларини келтирмоқда Sky Sports.
Аввалроқ, Аррисабалага 1 ҳафталик маоши миқдорида жаримага тортилгани ҳақида хабарлар тарқалган эди.