“Бавария” ҳимоячиси Жером Боатенг Германия терма жамоаси бош мураббийи Йоахим Лёвнинг қарорига изоҳ берди.

“Лев бугун бошқа терма жамоага чақирилмаслигим ҳақида хабар берди. У ёшларга кўпроқ имконият бермоқчи.

Бу хабарни эшитиб тушкунликка тушдим, чунки терма жамоада ўйнаш ҳар доим ёқимли. Лекин шундай бўлсада мураббийнинг қарорини хурмат қиламан.

Мен ҳали узоқ вақт давомида юқори даражада футбол ўйнай олишимга ишонаман ва буни келажакда кўрсатанман ҳам.

Германия либосида ўйнаганимдан фахрланаман ва ҳеч қачон 2014 йилни унутмайман. Албатта, терма жамоа билан бошқача тарзда хайрлашмоқчи эдим. Германияга омад тилайман!”, - дейди Боатенг.