Ўзбекистонлик спортчилар Россиянинг Красноярск шаҳрида бўлиб ўтаётган Бутунжаҳон қишки универсиада ўйинларида ўз иштирокларини давом эттиришмоқда.
Тоғ чанғичисининг суперкомбинация (супер-гигант ва слалом) йўналиши бўйича баҳсларда вакилларимиз Комилжон Тўхтаев, Дамир Бухарбаев ва Алдиёр Гаипов дунёнинг 30 га яқин давлатидан ташриф буюрган 65 нафар спортчи қатори ушбу мураккаб йўналишда ўз имкониятларини синаб кўришди.
Дастлаб супер-гигант баҳсларида хатоликка йўл қўйган вакилларимиз слаломда ўз кўрсаткичларини яхшилаб олишди.
Иккала синов якунига кўра Комилжон Тўхтаев 35-ўринни эгаллаган бўлса, Алдиёр Гаипов 41, ва Дамир Бухарбаев 42-натижани қайд этишди.
Таъкидлаш жоиз, бу турда энг яхши натижани швейцариялик Янник Шабло қайд этди, кейинги совринли ўринлар россиялик спортчиларга насиб этди.
Эртага тоғ чанғичиларимиз слалом-гигант йўналишида иштирок этишади.
