“Бухоро” 2015 йилдан буён ФИФА эътиборида қолиб кетаётганди. Молдовалик футболчиларга берари бор бўлган клуб, бир неча кун аввал барча қарзларидан мосуво бўлди.
Биринчи навбатда Вадим Кравческуга 66 миллион сўмга яқин пул ўтказиб берилди. Кейин эса Виталий Пламадела 72 миллион сўмдан кўпроқ пулини қабул қилиб олди. Аввалроқ жамоа Вадим Чемиртан муаммосини ҳам ҳал қилишга эришганди.
Шу тариқа ФИФАнинг “Бухоро”га нисбатан эътирози қолмади. Энди жамоа Суперлигада ўйнаётган уч футболчи — Шавкат Муллажонов, Азиз Ибрагимов, Арслонмурод Омонов билан ҳисоб-китоб қилиши керак. Бу иш ПФЛ назоратида турибди. Клуб яқин орада бу қарзларидан ҳам қутилади.
2015 йилдан буён қаттиқ турилганида, “Бухоро”нинг бугунги раҳбарияти ҳам шунча қийналиб, аввалгиларнинг айби учун товон тўлаб юрмас эди. Бугун ва аввалги ҳолатни солиштираётганда шуларга ҳам эътиборли бўлишингиздан умидвормиз