Испания чемпионатининг 28-тури доирасида "Реал" ўз майдонида "Сельта"ни қабул қилди. Зидан жамоани қабул қилиб олганидан кейин Иско, Асенсио, Бэйл, Марсело ва Навас асосий таркибга қайтарди.

Ўз навбатида бу футболчилар катта иштиёқ билан ўйнаб, мураббийнинг ишончини оқлашга ҳаракат қилишди. Биринчи бўлимда ҳисоб очилмади.

Иккинчи бўлимда эса Зидан жамоаси ғалабани ўз томонига оғдирди. Дастлаб Модрич олис масофадан зарба бериб, ҳисобни очганди. Аммо офсайдда турган Варан дарвозабон нигоҳини тўсгани учун VAR голни бекор қилди.

Орадан кўп ўтмасдан Марселонинг узатмасидан кейин Иско яқин масофадан дарвозани ишғол қилди. 77-дақиқада эса Бэйл яккама-якка вазиятга чиқиб, қулай имкониятни қўлдан чиқармади — 2:0.

Шу тариқа, Зиданнинг "Қироллик клуби"га қайтиши муваффақиятли чиқди. Жамоа ўз очколарини 54тага етказиб, 2-ўриндаги "Атлетико"дан 2 очко ортда қолмоқда. Симеоне жамоаси тур баҳсини бугун Бильбаода "Атлетик"га қарши ўтказади.

Испания Ла лигаси, 28-тур
Реал Мадрид – Сельта 2:0 (0:0)
Голлар: 1:0 – 62 Иско, 2:0 – 77 Бэйл.
Реал Мадрид – Навас, Марсело, Варан, Рамос, Одриосола, Кроос, Иско (Себальос, 63), Асенсио, Модрич (Вальверде, 77), Бэйл, Бензема (Диас, 82).
Сельта – Бланко, Жунка (Худт, 4), Араухо, Васкес, Костас, Йокушлу (Бельтран, 75), Браис Мендес, Лоботка, Буфаль (Юльсагер, 68), Систо, Макси Гомес.
Огоҳлантириш: Бэйл (45).