Профессионал бокснинг ярим ўрта (-66,68 кг) вазн тоифасининг IBF йўналиши чемпиони, америкалик Эррол Спенс (25-0, 21 КО) асли мексикалик бўлган, тўртта вазн тоифаси собиқ чемпиони Майки Гарсияга (39-1, 30 КО) қарши рингга кўтарилди.
Майки бу жангда иштирок этиш учун бир йўла иккита вазн тоифасига кўтарилишига тўғри келди. Аммо бу таваккал ўзини оқламади. Бунгача ярим енгил (57,15 кг), супер ярим енгил (58,97 кг) енгил (61,23 кг) ва супер енгил (63,5 кг) вазн тоифаларида чемпионликни қўлга киритган спортчи бу сафар салкам 5 кг ортиқча вазн тўплашига тўғри келди.
Жангнинг дастлабки раундларидан, охирига қадар Эррол Спенс яққол устунлик қилди. Бўй ва қўлларининг узунлигидан унумли фойдаланган америкалик спортчи якунда ҳакамларнинг бир овоздан (120-108, 120-108, 120-107) берган овозига кўра ғалаба қозонди.
Элатиб ўтамиз, мазкур вазнда рингга чиқаётган ўзбекистонлик Қудратилло Абдуқаҳҳоров (15-0, 9 КО) 30 март куни айнан Спенс чемпион бўлиб турган IBF йўналишида биринчи рақамли, мажбурий даъвогар бўлиш учун рингга чиқади. Агар у ғалаба қозонадиган бўлса, айнан Эррол Спенсга қарши рингга кўтарилиш имкониятига эга бўлади.
