Италия чемпионатининг 28-тури доирасида марказий ўйин бўлиб ўтди. Мухлислар "Сан-Сиро" стадионида бўлиб ўтган Милан дербисига гувоҳ бўлишди.

Бу баҳсда расмий меҳмон мақомига эга бўлган "Интер" тезкор гол уришга муваффақ бўлди. Учрашувнинг 3-дақиқасидаёқ Весино ҳисобни очишга муваффақ бўлди. Ушбу гол "нерадзурри" фойдасига ишлади. Танаффусга қадар улар рақиб дарвозасига яна камида 2та гол уришлари мумкин эди. Аммо яна ўша Весино қулай вазиятларни голга айлантира олмади.

Иккинчи бўлим бошида эса бурчакдан етказилган узатмани Стефан де Врей голга айлантириб, ҳисобдаги фарқни иккитага оширди. Буёғига жамоалар ҳисобда қувлашмачоқ ўйнашди. Дастлаб Бакайоко бош билан ҳисобдаги фарқни қисқартирди.

Баҳснинг 67-дақиқасида ҳакам "россонери" дарвозаси томон пенальти белгилади. Лаутаро Мартинес ундан самарали фойдаланди. Орадан 4 дақиқа ўтиб Мусаккьо ҳисобни 2:3 кўринишига келтириб қўйди.

Қолган дақиқаларда Гаттузо шогирдлари ҳеч бўлмаса дурангга эришиш учун олдинга ташланишди. Ўйин қўшиб берилган энг сўнгги — 6-дақиқада майдон эгалари ҳисобни тенглаштиришлари мумкин эди. Аммо яқин масофадан йўлланган зарбани "Интер" ҳимоячиси маҳорат билан қайтариб қолди.

Шу тариқа, "Интер" ўз очколарини 53тага етказиб, "Милан"ни қувиб ўтганча, 3-ўринга чиқиб олди. "Россонери" эса 4-ўринда қолди. Уларнинг бахтига "Милан" таъқибчилари — ЕЧЛ йўлланмаси учун кураш олиб бораётган "Рома" ва "Аталанта" жамоалари очко йўқотишганди.

Италия А серияси, 28-тур
Милан – Интер 2:3 (0:1, 2:2)
Голлар: 0:1 – 3 Весино, 0:2 – 51 де Врей, 1:2 – 57 Бакайоко, 1:3 – 67, пенальти Мартинес, 2:3 – 71 Мусаккьо.
Милан – Доннарумма, Калабрия, Мусаккьо, Родригес (Кутроне, 58), Романьоли, Лукас Пакета (Кастильехо, 46), Кессиэ (Конти, 69), Чалханоглу, Бакайоко, Сусо, Пионтек.
Интер – Ханданович, Д`Амброзио, Шкриньяр, Асамоа, де Врей, Гальярдини, Весино (Раноккия, 90), Перишич, Брозович (Валеро, 73), Политано (Кандрева, 84), Мартинес.
Огоҳлантиришлар: Брозович (14), Родригес (32), Романьоли (66), Весино (79), Сусо (79), Конти (89), Гальярдини (90).