Икки ўйинни солиштириш эса чамамда нотўғри натижа беради. Биринчисида, Уругвай мундиалга тайёргарлик доирасидаги сўнгги ўйинида майдонга тушди.
Бунда футболчилар Жаҳон чемпионатини ўтказиб юбормаслик учун ҳам жароҳат олмасликка онгли равишда ҳаракат қилишади.
Бошқа томондан Ўзбекистон терма жамоаси Жакартадаги Осиё ўйинларига тайёргарлик кўраётгани учун, Кападзе термани асосан ёшроқ футболчилардан шакллантиришга ҳаракат қилганди.
Хитойдаги ўйинда Купер жамоаси ҳам 0:3 ҳисобида енгилди. Бироқ бу умуман бошқа учрашув. Бунда Уругвай сафида бир қатор етакчилар ўйнай олмади, аммо улардан кам эмаслигини кўрсатмоқчи бўлган А серия йигитлари бор эди. Ўйинга бўлган муносабат ҳам, вақт ҳам, майдон ва макон ҳам умуман бошқа эди.
Савол: Купер 0:2 ёки 0:1 ҳисобида енгилганида хурсанд бўлармидик? Яъни, бу ҳисоблар биздаги ўсишни ёки олдинга қадамни кўрсатиб берармиди? Фикримча, солиштириш бундай бўлмаслиги керак. Агар Уругвай 5 та гол уриши шарт бўлганида, бизга ҳар икки ўйинда ҳам 5 та гол ура оларди. Чунки бу Уругвай мундиалдаги энг яхши натижасини қайд этган Россия термасига ҳам ўша мундиалнинг гуруҳ босқичида жавобсиз 3 та гол урган (Россия футболи ҳам, Ўзбекистон футболи ҳам бир гўр деган фикрга қўшилишим мумкин, аммо Россия термаси Ўзбекистондан кучсиз деган фикрга қўшила олмайман).
Мураббий таркиб танлашда адашди, дейишимиз мумкин. Аммо унда таркиб танлаш учун 1 дона вариат бор, бизда эса 10 дан зиёд. У футболчилар кечаси қандай ухлаган-у, кимнинг
кайфияти қандай яхшироқ билади, бизда эса бундай имконият йўқ.
Уругвай каби рақибларга қарши ўйинларимизни солиштираверишдан маъни йўқ. Уларга қарши 1 марта ўйнаймизми ёки 10 марта — ўрганавериш керак. Расмий ўйинлардаги тўқнашувимизга қадар 10 марта 0:3 га ютказавермаймизми, менга деса. Иордания ёдингиздами, расмий ўйин ўтказганди Уругвай билан.
Қачондир бизга ҳам шундай ўйин насиб қилади. Унгача ўрганавериш керак. Чунки биз уругвайлик футболчилардан ўнлар чақирим ортдамиз. Аниқроқ чақиримни билиб олиш учун нечта гол ўтказаётганимизга кўп урғу бериш шарт эмас, демоқчиман.
