Мамлакат миллий чемпионатининг 2-турига тайёргарлик кўраётган Бекободнинг “Металлург” жамоаси пойтахтимиздаги “Бунёдкор” академияси майдонида Олмалиқнинг АГМК жамоасига қарши назорат учрашувини ўтказди. Қизиқарли ва муросасиз курашлар остида кечган ўйинда Андрей Шипилов шогирдлари 2:0 ҳисобида ғалаба қозонишди.
Биринчи таймда ҳисоб очилмаган бўлса, иккинчи тайм бекободликларнинг устунлиги остида ўтди. Бўлим бошидаёқ Сервер Жепаров ўз маҳоратини намойиш этиб, ҳисобни очди. Бу эса “Металлург” футболчиларининг янада эркин ўйнашлари учун замин яратди. АГМК эса тезроқ ҳисобни тенглаштириш учун олдинга ташланди. Юзага келган бўшлиқлардан тайм якунида Сергей Тумасян унумли фойдаланди ва якуний ҳисобни ўрнатди.
Мазкур учрашувдан кейин “Металлург” футболчиларига бир кунлик дам берилди. Душанба кунидан эътиборан жамоа аъзолари Қибрай ўқув машғулот масканида Coca Cola Суперлиганинг 2-турига, “Бухоро”га қарши ўйинга тайёргарликни давом эттиришади.