Mamlakat milliy chempionatining 2-turiga tayyorgarlik ko‘rayotgan Bekobodning “Metallurg” jamoasi poytaxtimizdagi “Bunyodkor” akademiyasi maydonida Olmaliqning AGMK jamoasiga qarshi nazorat uchrashuvini o‘tkazdi. Qiziqarli va murosasiz kurashlar ostida kechgan o‘yinda Andrey Shipilov shogirdlari 2:0 hisobida g‘alaba qozonishdi.
Birinchi taymda hisob ochilmagan bo‘lsa, ikkinchi taym bekobodliklarning ustunligi ostida o‘tdi. Bo‘lim boshidayoq Server Jeparov o‘z mahoratini namoyish etib, hisobni ochdi. Bu esa “Metallurg” futbolchilarining yanada erkin o‘ynashlari uchun zamin yaratdi. AGMK esa tezroq hisobni tenglashtirish uchun oldinga tashlandi. Yuzaga kelgan bo‘shliqlardan taym yakunida Sergey Tumasyan unumli foydalandi va yakuniy hisobni o‘rnatdi.
Mazkur uchrashuvdan keyin “Metallurg” futbolchilariga bir kunlik dam berildi. Dushanba kunidan e’tiboran jamoa a’zolari Qibray o‘quv mashg‘ulot maskanida Coca Cola Superliganing 2-turiga, “Buxoro”ga qarshi o‘yinga tayyorgarlikni davom ettirishadi.