ЎФФ собиқ матбуот хизмати бошлиғи Санжар Ризаев марҳум ЎФФ президенти Мираброр Усмонов ҳақидаги ҳужжатли фильмни тақдим этди.

"2017 йил Мираброр ака Ўзбекистон Футбол Федерациясидан кетиши аниқ бўлгач, чақириб «мендан кейин фарзандларим, набираларим кўриши учун» қисқа бир видеофильм қилиб беришни сўради. Фильмки, Мираброр Усмоновнинг футболда амалга оширган ишлари ҳақида. 
Аввалига оилавий давра учун қисқа метражли фильм учун ҳаракат бошланди. Лекин, сценарий ривожланиши натижасида бу лойиҳа кичик бир хужжатли фильмга айлана бошлади. Моҳир режиссёр Фаррух Расулов ҳам фильмнинг тобора кенгайиб бораётганини кўриб, хужжатли фильм қилиш таклифини берди

Шу тариқа 5-10 дақиқалик фотосуратларнинг кетма-кетлигидан иборат жуда бир оддий фильмдан салкам 50 дақиқали хужжатли фильм дунёга келди. Унинг устида Фаррух Расулов бошчилигидаги техник гуруҳ иш олиб борди. 2017 йил август ойида суратга олиш ишлари тугаб, фильм тайёр бўлди.

Орада Ўзбекистон Футбол Федерациясининг сайлов конференцияси тугаб, Мираброр ака президентликни Умид Аҳмаджоновга топширдилар. У кишининг ўзи ҳаётининг охирги кунларигача ўз ишлари билан машғул бўлсаларда, футболни унута олмади; бир армон билан яшади: жаҳон чемпионати армони…

Фильм сифатли камераларда суратга олинган, яхши монтаж қилинган эди. Ҳар қандай телеканалнинг архивини, эфирини безаб бера оларди, чамамда. Бир куни Мираброр акага «балки, фильмни телеэкранларда намойиш қилармиз» деганимда, рози бўлмадилар. «Вақти келади, ўзим айтаман», дедилар.

… ва айтмай кетдилар. Кейин маълум бўлишича, биз Фаррух билан бирга ишлаган ушбу фильм айнан бугунги намойиш учун қилинган экан. Фильм шу кунларда намойиш этилмаса, ўзининг аҳамиятини йўқотган, ўз мақсадига эришмаган бўлади. Чунки, бугун Мираброр Усмонов орамизда йўқ", - деб ёзади Санжар Ризаев твиттердаги ўз саҳифасида.

Қуйида ушбу фильмни томоша қилинг.