Урганч шаҳридаги “Ёшлик” спорт мажмуасида бокс бўйича 2003-2004 йилларда туғилган ўсмирлар ўртасида Ўзбекистон чемпионати бошланди.

Ўзбекистон Республикаси Жисмоний тарбия ва спорт вазирлиги календарь режасига биноан уюштирилган мусобақанинг очилиш тантаналари байрамона тарзда ўтди. Белгиланган вақтда мусиқа садолари янграб, жамоалар 1996 йилги Атланта Олимпиадаси совриндори Карим Тўлаганов бошчилигида чиқиб келишди. Улар ёнида мусобақа ҳакамлари ҳам сафланишди.

Чемпионатни табрик сўзи билан очиб берган Хоразм вилояти жисмоний тарбия ва спорт бошқармаси бошлиғи Шокир Мадаминов, юртимизда спортни ривожлантириш борасида олиб борилаётган хайрли ишларнинг аҳамияти ҳақида тўхталиб, мусобақа қатнашчиларига омад тилади.

Ўз навбатида Ўзбекистон ўсмирлар терма жамоаси бош мураббийи, халқаро тоифадаги спорт устаси Бекзод Хидиров ҳам сўзга чиқиб, барчани ўзига хос спорт байрами билан қизғин қутлади.

Чемпионатнинг очилиш маросими ниҳоясига етгач, Осиё чемпиони, “Ўзбекистон ифтихори” Б.Хидировнинг мазкур мусобақа ҳақидаги фикр-мулоҳазалари билан қизиқдик.

– Ташкилотчилар чемпионатга пухта ҳозирлик кўришибди. Бу ерда яратилган шарт-шароит ва имкониятларга ҳавас қилса арзийди. Умуман олганда, мазкур чемпионат ёш боксчиларимиз учун маҳорат ва тажриба мактаби вазифасини ўташи баробарида, терма жамоага номзодларни саралаб олиш имконини ҳам беради. Ишончим комилки, Хоразм воҳасида янги-янги иқтидор соҳиблари кашф қилинади, - деди Б.Хидиров.

Таъкидлаб ўтиш жоиз, Ўзбекистон чемпионатида Қорақалпоғистон Республикаси, вилоятлар ва Тошкент шаҳридан 300 нафарга яқин ёш боксчи 15 та вазн тоифасида рингга кўтарилади.

Мусобақа 10 апрелгача давом этади.