Urganch shahridagi “Yoshlik” sport majmuasida boks bo‘yicha 2003-2004 yillarda tug‘ilgan o‘smirlar o‘rtasida O‘zbekiston chempionati boshlandi.

O‘zbekiston Respublikasi Jismoniy tarbiya va sport vazirligi kalendar rejasiga binoan uyushtirilgan musobaqaning ochilish tantanalari bayramona tarzda o‘tdi. Belgilangan vaqtda musiqa sadolari yangrab, jamoalar 1996 yilgi Atlanta Olimpiadasi sovrindori Karim To‘laganov boshchiligida chiqib kelishdi. Ular yonida musobaqa hakamlari ham saflanishdi.

Chempionatni tabrik so‘zi bilan ochib bergan Xorazm viloyati jismoniy tarbiya va sport boshqarmasi boshlig‘i Shokir Madaminov, yurtimizda sportni rivojlantirish borasida olib borilayotgan xayrli ishlarning ahamiyati haqida to‘xtalib, musobaqa qatnashchilariga omad tiladi.

O‘z navbatida O‘zbekiston o‘smirlar terma jamoasi bosh murabbiyi, xalqaro toifadagi sport ustasi Bekzod Xidirov ham so‘zga chiqib, barchani o‘ziga xos sport bayrami bilan qizg‘in qutladi.

Chempionatning ochilish marosimi nihoyasiga yetgach, Osiyo chempioni, “O‘zbekiston iftixori” B.Xidirovning mazkur musobaqa haqidagi fikr-mulohazalari bilan qiziqdik.

– Tashkilotchilar chempionatga puxta hozirlik ko‘rishibdi. Bu yerda yaratilgan shart-sharoit va imkoniyatlarga havas qilsa arziydi. Umuman olganda, mazkur chempionat yosh bokschilarimiz uchun mahorat va tajriba maktabi vazifasini o‘tashi barobarida, terma jamoaga nomzodlarni saralab olish imkonini ham beradi. Ishonchim komilki, Xorazm vohasida yangi-yangi iqtidor sohiblari kashf qilinadi, - dedi B.Xidirov.

Ta’kidlab o‘tish joiz, O‘zbekiston chempionatida Qoraqalpog‘iston Respublikasi, viloyatlar va Toshkent shahridan 300 nafarga yaqin yosh bokschi 15 ta vazn toifasida ringga ko‘tariladi.

Musobaqa 10 aprelgacha davom etadi.