“Формула-1” пойгаларига Нидерландия гран-приси қайтадиган бўлди. Янги гран-прининг илк пойгаси Зандвортдаги автодромда 2020 йил майида бўлиб ўтади.

Маълум қилинишича, автодром эгаларининг “Формула-1” раҳбарияти билан келишуви 5 йилга мўлжалланган.   

Аввалроқ “Формула-1” эгалари Зандвортдаги трасса раҳбариятига Нидерландия гран-приларини ўтказишни таклиф қилишган. Нидерландиядаги босқичнинг ўтказилишига ҳозирда MotoGP пойгалари ўтувчи Ассендаги автодром ҳам даъвогарлик қилган. Таклифга жавобан Зандворт маҳаллий кенгаши пойгаларга 4 млн евро инвестиция киритишга тайёрлигини маълум қилган. Ушбу трассада пойгалар 1952 йилдан 1985 йилгача ўтган.

Шунингдек, кейинги йилдан “Формула-1” тақвимида яна бир янги босқич – Вьетнам гран-приси пайдо бўлади. Шу муносабат билан Ханойда пойга трассасини қуриш бошлаб юборилган. 

Вьетнамдаги босқични ўтказиш бўйича мамлакат раҳбарияти билан 10 йиллик шартнома тузилган. Ушбу пойгага ҳар йили 60 млн доллар сарфланади. 

Вьетнам гран-приси моҳиятан Жануби-Шарқий Осиёда Малайзия Гран-приси ўрнини эгаллаши керак. Малайзиядаги босқич 2017 йилдан кейин пойгалар тақвимидан чиқарилган.